يعني تقصدين اننا لازم ننتحدى الحياه ؟

- طفل في نهاية يومه راح لوالدته وطلب انه ينام بحضنها ، طبعاً خمته امه لصدرها وحبته على راسه وقالت له : كلي احضان يآوليدي ..
قال الطفل : يمه انا اليوم صحيت مبسوط بس مدري ليه تنكدت الظهر وبكيت من سامي ولد جيرانا !!
قالت له الأم : طبيعي يآوليدي أنك تبكي لأنه حذفك بالكوره على راسك والضربه كانت تألم ..وانا خفت عليك بصراحه " فديت عمرك انا "
ضحك الطفل وقال : يمه ليش ما نعيش مبسوطين على طول ؟
قالت له : مستحيل يآولدي ، ربي خلق الفرح والحزن والضيق والفرج والسعاده والكدر والضحك والألم ...... وكلها مشاعر نعيشها باليوم أكثر من مره .
جلس الطفل قبال امه ومسك يدها وقال لها : يمه أذكر مره بكيتي وكنت أبكي معك وانا مدري وش فيك .. كنتي تبكين من وش يمه ؟
قالت امه : كنت أبكي من ظلم ياولدي بس الحمدلله ربي فرج همي .. ونصرني !
قال الطفل : لا عاد تبكين يايمه .. وان شاء الله اكبر واخليك على طول مبسوطه ..دايم تضحكين !
قالت له الأم : ياولدي أبيك تفهم أنه الحياه ماهي على وتيره وحده ولاهي شكل هندسي نفصله تفصيل ، الحياه معقده وظروفها اعقد منها ، احيان تكون مبسوط فجأه تفاجئت بخبر " يخرب عليك فرحتك " وأحيان تكون بحالك " ويجي من يأذيك ويزعجك ويخرب مزاجك " وأحيان تصبح بعافيتك وتنام وانت بالمستشفى ولا تدري عن نفسك .. الحياه ياولدي كلها تحديات ومواقف وحكم .. وبكل يوم ننتهي بحكمه جديده ومواقف ما تتنسي بسهوله .. منها الي يسعدك ومنها الي يضايقك .. هذي هيا الحياه ياولدي ..
استغرب الطفل من كلام امه : يعني تقصدين اننا لازم ننتحدى الحياه ؟
ضحكت الأم وربتت على كتفه وقالت له : هذي هي حكمتك هذا اليوم .. " أتحدى الحياه " .. ويالله نام وراك مدرسه بكره .. :)