- الوفا وما آدراك ..ما الوفاء ..!
كثير من الأشعار والقصايد يتكلمون عن الوفاء الحقيقي .. الي انعدم بين البشر وصارت كلمة " وفاء " كلمة مثاليه مجردة من الواقع أو بالأصح مالها اي علاقة بوقتنا الحالي .. وصار الواحد سهل انه يخون صديقه بلحظة ضعف أو بدون أي لحظات .. بسبب المزاج الشخصي ..!
الفنانه احلام غنت قبل كم سنه أغنيه .. ولكن كلمات هالأغنيه للحين في بالي :
تحب وتصدق وتوفي وبالأخر يخونونك ..!
..................ولما تطيييييح يآقلبي ولا كنهم يعرفونك ..!
وأقرب الناس لك في لحظات ضعفك وهزيمتك .. ممكن يتخلون عنك ببساطه ، والعيب مو فيك ترى !! فيهم ، وتبدأ مسلسل اللوم لنفسك ياليتني ما وفيت ياليتني ما قدرت ياليتني ما حبيت ، وللأسف هالكلام ماراح يطلع معاك بنتيجه الا بالقهر لك وبس ..!
وممكن يغدرون فيك لأسباب تافهه لمجرد الأنتقام منك لا أكثر وهالشيء راح يأثر عليهم أكثر لأنهم " خسروك كشخص مهم بالنسبه لهم " وثانيا لأنهم خانوك وغالبا علاقات الخيانه ماتنجح ، وكثير نشوف حولنا هالقصص وتدل على نقص عقولهم ..
وأما النوع الثاني من عدم الوفا وهو النقيض تماما " الخيانه " والحين أبشركم طال عمركم .. الخيانه صارت موضه دارجه كل مين يخون ويمشي ، وطبعا أسباب الخيانه كثير ولكن الخيانه صعبه على النفس ومحد بهالدنيا يقدر يتحملها ومن وجهة نظري خيانة الصديق أقوى بأضعاف الأضعاف من خيانة الحبيب ..
عشان كذا الواحد يستعد لأي خيانه وفي أي وقت وفي أي لحظه من اقرب الناس له قبل الغريب ، والأمثله على هالموضوع كثير واتوقع اكثرنا كان تجربة حيه لهذا الموضوع أو تعرض له .. والحين ابي اذكر وش الي يصير لما نكتشف خيانة شخص قريب منا .....
1/ مانصدق الموضوع وممكن توصل انه نكذب عيونا ونقول لا اكيد فيه سوء فهم ..
2/ أذا صدقنا نتنقل للمرحلة الثانيه من الأنبلاه مع رفع الحواجب قليلا كنك مستغرب مع نفسك ..
3/ ننتظر بس ماتدري وش تنتظر .. حب راح وضاع منك ولا تبي مبررات !!
4/ ممكن تبدأ بالبكاء بس نادراً تكون هالنقطه قولولي ليييش ؟ .. لأنه لو كنت شاك بالموضوع من أول أو عندك خلفية عن الشخص الي قبالك ، واكتشفت خيانته راح تبكي .. لأنك كنت غبي شاك وساكت .. لكن اذا تفاجأت راح تستكثر الدمعه على ( حيوان بنظرك ) ..
5/ راح تفكر كيف تقدر تنسى الشخص الي كان جزء من حياتك وراح تحاول تمسح كل الذكريات ( لكن بالأخير ماراح تقدر لأنه هالشي يتعبك أكثر ) وهو الجهاد في النسيان ..
6/ راح ترجع شريط علاقتك للورى وتبدأ تكلم نفسك : ذاك اليوم ..؟ ايه صح ...! صح صح صار وصار ........! وفيلم هندي ماله نهايه ..بس فيلم هندي حزين ..
7/ تتمنى تعرف احد بهاللحظه انه يعرف بالموضوع ، ولو عرفت شخص واحد يعرف بالموضوع راح تطلع كل الي فيك عليه وراح يشوف وحش قدامه مو انسان وأذا مافيه أحد راح تنحبس هالمشاعر السلبيه داخلك ..
8/ طبعاُ ما راح اوصف المشاعر الي داخلك لأنه كل مشاعر هالكون السيئه فيك ، ويبدأ التناقض داخلك لأنك للحين مو مستوعب شي الي
صار
9/ السؤال الشهير الي راح تسأله : انا وش سويت عشان تخوني ؟!
10/ غالباً الي خاضوا هالتجربه يصير عندهم نوع من الفوبيا ( والله يلوم الي يلموهم ) يخافون من اي علاقه ..حتى لو راعي البقاله قالها السلامو عليكم ماما .. راح تسفهه ويمكن تلعن خيره ، وبعض الاحيان في اشخاص يتجابوا مع الموضوع ويعتبرونه شي وعدى ( وهذول الناس نقدر نقول تعودا ع الخيانات وصار الوضع عادي )
/
ونرجع للوفاء الي انعدم من قلوب البشر وصار الغدر بداله ، وفوق هذا الكلام كله نقول { الدنيا لسه بخير} .. وفي بهالدنيا ناس لو تعطيهم دم قلبك مو حرام فيهم إلا مايكفيهم ودك تعطيهم عيونك بعد ..
بس وين هالناس ..؟
ليست هناك تعليقات:
إرسال تعليق