يالله أنه يصبحكم .. ويمسيكم بكل خير ..~
كل عام وأنتم بألف خير ويارب يكون عام 1432هـ عام هجري جميل ومليئ بالمفاجاءات الحلوه ( قولوا امين وجع ) ، أولاً أحب أقولكم كلمه من قلبي " أحوبكم بشدة " وأعتز بوجودكم بحياتي ، وهذا شرف وتقدير لي ، وأسأل الله انه مايحرمني وجودكم ( لا تقولون آمين ..انا بس أقول آمييين هع ) بصراحه طرت علي هالفكره مدري من وين يمكن يوم موكا رسلت لي انه الجمعه هذي آخر جمعه في عام 1431هـ حسيت كنها تقول ترى أخر يوم بحيآتك ( موكا ما آحبك :( ) .. ولكن حبيت أنه حنا نتشارك تجارب بعض ونستفيد من خبرة بعض .. والشغله كلها مزوح وضحك وهبال ، وطبعاً سألت بعض البنات في المسن عن عام 1431هـ .. بصراحه البعض أجاب والبعض كان بالنسبه له هالعام لا تعليق ، والبعض خرج من هالعام بمجموعه من التجارب والقناعات الي أثرت فيه بشكل كبير .. حبدأ أولا بنفسي ( لا تددققون )
- وش الأشياء الحلوه والمره الي مرت عليك بعام 1431هـ ووش الأشياء الي طلعتي فيها من هالتجارب ..؟
من 1/1 الى 29/12 .. وأنا أحاول أعيش قد ما أقدر ، بالنسبه لي الحياه فرصه حلوه أننا نستغلها بالأشياء الي تبهجنا موب تكدر خواطرنا ، وبالنسبه لي مريت بمواقف وخسارات فادحه ولكن كان بالمقابل انجازات عظيمه بشخصيتي وبحياتي الشخصيه وفي مجال العمل الميداني الأشياء السيئه الي صارت لي ، هيا خسارتي لبعض الناس المقربين لي لأسباب كثيره معظمها مني وانا اعترف بخطئي ( ومحد له صلاح ) ومعظمها منهم بصراحه وبعضها من غير سبب ( ابليس لعب بينا طيرا ههههه) ، وبصراحه الي يخرج من حياتي الله معاه ما احب اتعب نفسي بالتفكير بالماضي سواء الغلط مني ولا من الشخص الي قدامي ..وماتوقف الدنيا على فراق غالي ..
والاشياء الإيجابيه .. تعلمت شيء مره مهم بحياتي وعمري ما اقتنعت فيه بس التجارب الي عشتها بهالسنه خلتني أخرج بهالقناعه " أرضى بالقليل " ، بالنسبه لي زمان ما كان يرضيني شي ، دائماً متذمرة ولكن الحين الحمدلله ، أرضى بقسمتي وقدري وروحي رياضيه في كل الأمور ، أحس عادي بالنسبه لي أني أبدأ من الصفر وأطمح للأكثر ، بس بالرغم ذا أكتفائي بالقليل يخلني أطمح للأكثر ولكل مجتهد نصيب ..
- طبعاُ أحلى وألذ وأعذب طفله جاتنا في هالعام " لمو" يااااااااني فديتها هي وامها ( الله يعين هالبزر منك بسسس ) وقبولي بالماستر كان حلم غير متوقع بصراحه ، وأممم وخبر حمل بوسي التبن ( صقيقتي وحبيبتي المتخلفه ) ودخول خيو عبودي الكليه ( ياني كنت شايله همه بلى في شكله ) وجيت خيو حمودي من كندا زياره( والله مره مفتقدينه الخايس ) ، وطولت شعري وصايره ما اقصه وأهتمامي بنفسي ( والله ما كنت اسويها زمان أجل انا من متى احط مناكير ههههههه واروج ملونه وشعر كيرلي ..الله يرحم ام امن جابتني بس ) ، صايره احس بقيمة أهلي كثير وخصوصاً لما توظفت فقدتهم وعرفت وش يعني قيمة الأهل ووش يعني العزوه ، وخصوصاُ خدوج وسمرمر صرنا صحبات ( بس ترى للحين ما احب اروح معاكم الاندلس ههههه ) يطفشوني :( .. بس هذا الي يحظرني ..
- أحلام تحققت في هالعام وأحلام ماتحققت للحين ..؟
والله ياكثر أحلامي .. أحسها بعض الأحيان أكبر مني .. يارب أصير مدربة نفسية وأقدر أغير أشخاص كثير ( لأني بصراحه انبسط لما اقدر اساعد انسان أو أساعده على تغيير شيء سلبي فيه ) وآممم أحلم أنه نسكن أنا واخواني واخواتي في بيت كبير يضفنا حنا وبزورتنا ونصير زيي ( زوارة خميس <-هذي نهاية الي يتفرج أرانب المسسلسلات هههههه)
- أحلم أني أجيب سعود وبندر ولا بندر وسعود للحين مافكرت وش اسمي ولدي العود ههههع.. ولا فكرت وش اسمي بنتي (ما احب البنات )
-أتمنى أنه ما اهتم بأي شي بحياتي وأنه يجيني برود أعصاب .. لأني بس اهتم اعصب واذا عصبت اصدع واذا صدعت اسخن واذا سخنت ارتجف واذا ارتجفت اصرخ واذا صرخت اجيييييييييب العيد ههههه <- ماتبي تفهمينا انك بتولدين الحين <-وجه معصب
- احلم بفارس احلامي الاسمراني ( اوييلاااه بث ) وخروو وخرووو <- محد ماسكك يلعن شكلك ، ويدق عود ابيه ههههه ورومانسي ومهياطي مثلي ودمه خفيف يعني كل مايقول كلمه اضحك ( هبل ذا مو من جدك اكيد ؟ ) ووووووآمممم اش كمان ويجيب لي هدايا بسبب ومن غير سبب ، يعني ساعات / عطور ( ماتبينه يجيبلك طقم ذهب يالخدميه ) ويكون مسوي سكسوكه ( يمه عذاااابي ) ويحطلي رساله تحت مخدتي زي الأفلام هههه ولا يكتب على المرآيآ " آحبك دودي " .. بسكت لآ أتحمس أكثر ههههه <- نصيحه لاعاد تتفرجين أفلام مصريه بطلوها الناس
- حكم استنتجتيها من تجاربك الشخصيه ..؟
- لا تعطي احد اكبر من حجمه .. يعني مو مثلا تحب ترمي مافيك ودونك للي تحبه ( خير وش تحسب انت مثلن مثلن بيجيك ركض ويطيح عند رجولك ) .. حب لكن بعقل
- لا تندم على شي سويته .. ياكثر ما نندم والمشكله ليه نندم المفروض نتحمل نتيجة قرارتنا ونتحمل اخطاءنا ومانرميها على غيرنا ..
- لا نخلي الماضي يلاحقنا في لحظتنا الحاليه .. كثير ناس اجسادهم بالحاظر وقلوبهم مرميه بالماضي المفروض ننسى كل شيء يذكرنا بالماضي ونتجاهل وخصوصاً الموت ياكثر الي يعيشون هالتجربه وانا أولكم لكن صعب نخلي فقدانا لأشخاص قريبين من قلوبنا حيل سبب تعاستنا وسبب في غربلتنا بالمستقبل .. لازم نتأقلم على فقدانهم..
-لا تلوح للمسافر ، المسافر راح ( اسكتي لا يجيك كف )
- في شي حابه تضفينه ابو شكلك على ابو شكلك الي يسوي معاك تقرير ..؟
ايه ودي أقول للبنات كل سنه وأنتم وأهلكم وأحبابكم وكل شخص قريب منكم بخير ، اتفاءلوا واصنعوا البسمه داخلكم ، دائما خلوا قلوبكم زي الأطفال لما يستنون هديه ولا ريال يونسهم ، انتم أنتظروا مفاجاءات حلوه في هالسنه الجايه ، والله ماتدرون يمكن عام 1432هـ يكون احلى عام بالنسبه لك انت وانتِ وانتوا ، وأهم شيء حسن الظن بالله عز وجل " قال الله عز وجل في الحديث القدسي : { أنا عند حسن ظن عبدي بي فليظن بي مايشاء } .. والله لو ظنينا خير بالله ما كان هذا حالنا..
وثاني شي أبي انصحكم بالأستغفار ثم الأستغفار ثم الأستغار .. والله يالأستغفار يامفعوله عجيييييب تقولون كنه جنود من الله تيسرلك امورك ، بصراحه انا ما كنت أتشجع وفي النادر استغفر ( نسأل الله السلامه ) بس وحده الله يذكرها بالخير كانت معايا بالمركز واسمها برووو ، قالت لي وراك ماتستغفرين وقامت تحكيني وتشجعني ومجرد ما جربت واستغفرت والله ياحياتي انقبلت فوق تحت والحمدلله ، كل شي اتيسرلي ..
واذا كسلانين يكفي 100 بعد الفجر و100 بعد المغرب .. وقولوا دودي ماقالت ههههه
واخر شي احب اختمبه هالعام .. هو الدعوه لأمي وأبوي الله يرحمهم ويوسع مدخلهم ، والله اني أشتقت لهم حييييييل حييييل حييييل وودي أني أضمهم حييييييل ، صحيح الموت حق وانا مؤمنه بقضاء الله وقدره والي يعرفني يعرف قوة ايماني بهالموضوع لكن مافيه في هالدنيا مثل ضمة أمك وأبوك لك ، وأسأل الله انه مايحرمني ضمتهم بالفردوس ( والله ياني حهريكم ضضضضضم ههههههه) .. والله يخلي لكم والديكم ونصيحه مني لا تنامون وهم زعلانين عليكم ، اعتذرولهم حبوهم على روسهم ، وطوعوهم ترى ماراح تخسرون شي لو سمعتوا الكلام ، خلوكم قريبن منهم وساعدوهم بالي تقدروا عليه .. بلاشي النفخ وطولة اللسان والعنطزه الي مال ام امها داعي .. ( طيب ؟ )
- ماما بابا الله يرحمكم ويرحم موتنا ومتى المسلمين .. ماما بابا ( أمي ابويا ) أنتم عنواني ، وأنتم رحلتي ، وأنتم ذاكرتي ، وأنتم هويتي .. فقداني لكم دافع لي أني أعيش وأنجح وأفرح .. لأنه هذا الي تبونه لي .. وهذا الي ابيه يوصلكم ..أني مبسوطه وناجحه وأذكركم بمناسبه ومن غير مناسبه .. أحبكم والله لا يحرمني شوفتكم في الجنه ... وبس ..
حزنتكم صح ههههه
يالله المهم نشوف هياط البنات راح نبدأ ولكن بالحروف الأبجديه عشان محد يزعل ويقول ليه فلانه قبلي وفلانه بعدي وحركات البنته الي ما منها سنع هع ، واممم وفيه تحفظ على الأسماء يعني بدلع كل وحده وامممم وفيه تحفظ واضافات للبعض عشان نوصل المعلومه بشكل اوضح ..
(((( وأعتذر )))) من البنات الي ماسويت معاهم المقابله والي سويتها معهم وما نزلتها والله اني انهلكت بذا الموضوع وندمت اني عطيتكم وجه واستظفتكم ببرنامجي <- الله يابرنامج تسعه وتسعين هههه ، ع العموم أعتذر أشد أعتذأر ..هالمجموعه كانوا متصلين وقت ما خبطت الفكره بدميجتي مشان هيك خلصتهم بسرعه وبعدها حسيت اني سودانيه وماقااادره أكمل ...آآآي
ليست هناك تعليقات:
إرسال تعليق